العقل ده من عند ربك نعمة وتتحاسب عليها البصر من عند ربك نعمة وتتحاسب عليها الصحة نعمة من إلهك برضه تتحاسب عليها ولو تصلى طول حياتك مش حتردّ ذرّة فيها هو ده كل الكلام اللى اتربينا عليه هو ده نفس الكلام اللىّ كبرنا نسمع فيه بعد موتك روح بتطلع و هتتعذب و هتتحاسب فى قلب قبرك لو عملت أىّ شرّ فهتتعاقب اتنين طوال حياتك على كتافك بيراقبوك ملهمش فى الدنيا حياة غير كتابة كل سلوك كل هدفهم فى الوجود يكتبوا عنّك و يجرّدوك *** قولى لو رحت اشتريت عربية, جيت تسوق من غير فرامل عيب تصنيع متعرفوش, عملت حادثة خبطت راجل العيب هنا على الضحية, ولا ع السوّاق, ده فاشل؟ ولا على نصاب و باعلك, شئ كان فى أصله كله عاطل؟ لو الروح دى شئ حقيقى, كيميا المخ ليه مهمّة؟ ليه تأثّر على أفعالك؟ ليه بتقتل كل همّة؟ ليه دكتور نفسى يقولك خد حباية كل يوم؟ وليه يقولك دى بالذات تاخدها بس لازم قبل النوم؟ لو عقلى نعمة من الأساس يبقى ليه مش شغال؟ عطانى ليه عقل بايظ فيه دايما حرب و فيه قتال؟ لو بصري نعمة يبقى ليه عاطينى عين بتشوف هلاوس؟ ولو هموت هاتعذب أكتر يبقى ليه انا اصلا عايش؟ يبقى ليه ناوي يحاسبنى على كيمياء خلقها هو؟ يبقى ليه ناوى يعذبنى على كيميا بايظة زرعها جوا؟ لو دخلت ف يوم فى نار, هل حيمنع دوبامين؟ ولو دخلت ف يوم فى جنّة هيغرقنى سيروتونين؟ كل يوم مواد جديدة حتحسسنا بالحاجات؟ أصناف جديدة من السعادة , يلا نضرب مهدئات؟ جنّة ايه اللى الملايكة باعوا فيها مخدرات؟